【ಕವನ :- ಚಿಂತಿಸದಿರು ಗೆಳತಿ ನಾ ಚಿತೆಯಲ್ಲಿದ್ದರೂ..!】

 

ರವಿ ತಾ ಬಂದು,

ಬೆಳಗಿ ಈ ಭುವಿಯನೆಂದೂ,

ಹೊರಡನೇ ಮತ್ತೆ ಬರುವೆನೆಂದು ?

ಸಂಜೆ ಕೆಂಗಿರಣಗಳ ಬರವಸೆಯನಿಟ್ಟು,

ಚಂದ್ರನಲಿ ತನ್ನ ಬಿಂಬವ ಗುರುತಿಟ್ಟು.

ಚಿಂತಿಸದಿರು ಗೆಳತಿ ನಾ ಚಿತೆಯಲ್ಲಿದ್ದರೂ..!

ಮಳೆಹನಿಗಳು ಎಲೆಗಳ ಸೇರಿ,

ಎಲೆಗೆ ಅದು ಭಾರವಾಗಿ,

ಹನಿಗಳು ಮತ್ತೆ ಸೇರುವ ಮಾತ ನೀಡಿ,

ಮಣ್ಣು ಸೇರದೆ ?

ಗಿಡದ ಖಾಂಡ ಹನಿಯ ಹೀರಿ,

ಎಲೆಗೆ ಅದು ಮರಳಿ ನೀಡದೇ ?

ಚಿಂತಿಸದಿರು ಗೆಳತಿ ನಾ ಚಿತೆಯಲ್ಲಿದ್ದರೂ..!

ಭುವಿಯ ಉತ್ತಿ,

ಬೀಜ ಬಿತ್ತಿ,

ಬೆಳೆ ಬೆಳೆಯುವವರೆಗೂ ಕಾದು- ಕಾವಲಿದ್ದರೂ,

ಮಳೆ-ಬಿರುಗಾಳಿಗೆ ಬೆಳೆ ನಾಶವಾಗದೇ ?

ಭುವಿ ಮತ್ತೆ ಉತ್ತಿ-ಬಿತ್ತಲು ಬೆಳೆ ನೀಡದೇ?

ಚಿಂತಿಸದಿರು ಗೆಳತಿ ನಾ ಚಿತೆಯಲ್ಲಿದ್ದರೂ..!

ಇಂದು, ನಾ ಮಲಗಿರಲು,

ಉಸಿರು ಸೇವಿಸುವುದ ಮರೆತಿರಲು,

ನಾನು-ನನ್ನದು-ನನ್ನವರ ತ್ಯಜಿಸಿರಲೂ,

ರವಿ ಮುಳುಗಿ, ಮಳೆ ನಿಂತು, ಗಾಳಿ ತೂಗುತಿರಲು,

ಚಿಂತಿಸದಿರು ಗೆಳತಿ ನಾ ಚಿತೆಯಲ್ಲಿದ್ದರೂ..,

ಚಿತೆಯಲ್ಲಿ ಸುಡುತಿರುವುದು ನನ್ನ ದೇಹ ಮಾತ್ರ

ನನ್ನ ನೆನಪಲ್ಲಾ , ನನ್ನ ಮನಸಲ್ಲಾ, ನಿನ್ನೊಳಗಿರುವ ನನ್ನನಲಾ..!!!